Un manifestante de la movilización llevada a cabu na presentación istitucional de Fitur nel Hotel Reconquista, imputáu pola so participación na mesma
Pesi al testimoniu de los periodistes presentes y de qu’en numberosos videos puede comprebase que la movilización trescurrió pacíficamente, a Marcu Antuña acúsase-y de mancaures, menacies ya insultos, teóricamente mientres dicha movilización y poro ta citáu a declarar el miércoles 28 de febreru, nos xulgaos de Llamaquique (Uviéu), como imputáu.
Los denunciantes son la empresa Hotusa, condergada por acosu llaboral (xuntu col direutor del Reconquista), por violar los drechos de Raquel Agüeros nel so despidu nulu y por dellos despidos declaraos improcedentes, y dos trabayadores del Hotel, conocíos por figurar davezu como testigos de la empresa y contra los sos compañeros de trabayu nos xuicios por acosu y despidu.
Una vegada más trata de criminalizase la protesta social y de tratar de frenar por aciu del miéu la reacción de los trabayadores frente a los abusos patronales, polo que dende l’Asamblea de Trabayadores en llucha convoquen a una concentración pa acompañar al denunciáu nel so pasu polos xulgaos el próximu díe 28, a los diez y media de la mañana.
Dende l’Asamblea avisen de qu’esti tipu de midíes non solo nun van frenar la so movilización, sinón que-yos faen ser más coscientes de la necesidá de permanecer xuníos contra la esplotación llaboral “nun vamos dexar de denunciar la complicidá del gobiernu asturianu, del so presidente, Javier Fernández y del so partíu, el PSOE, nesta intolerable situación que se vive nel Reconquista, hotel de titularidá pública, desque la empresa Hotusa asumió la so xestión, con un pliegu de condiciones qu’espeyaba obligaciones no que cinca a la llexislación llaboral que tán incumpliendose una y otra vegada y que tendría de dar llugar a la rescisión del contratu con dicha empresa. Nun vamos cesar nel nuesu sofitu a la compañera Raquel Agüeros, victima d’una persecución inhumana pola so defensa de los drechos de los sos compañeros y compañeres y de la so propia dignidá como muyer trabayaora”.
Redaición InfoAsturies
This work is licensed under a Creative Commons Attribution 4.0 International License.
