L’acumulación de sanciones y sentencies contraries a la llibertá d’espresión nel estáu español saca a la cai a los xixoneses en defensa d’un de los drechos más básicos

Dellos cientos de presones aconceyaron ayeri na Plaza’l Parchís de Xixón p’amosar la so refuga al progresivu recorte de les llibertaes, denunciando la política del miéu cola que l’estáu pretende silenciar la voz del pueblu escontra los sos abusos.

La gran participación na concentración animó a los convocantes, el Bloque Críticu Estudiantil, a salir en manifestamientu improvisáu peles cais, primero fasta la sede del PP onde se glayaron conseñes comu “vosotros, facistes, sois los terroristes” y lluéu fasta la plaza l’Humedal, repitiendo tol camín que “tamos fartes de represión” “Estáu español, facista y represor” o “la llucha ye, l’únicu camín”, entemecies con frases alusives a los sos deseyos de futuru pa los borbones.

Na so intervención la vocera del Bloque Críticu acusó a tolos partíos políticos d’ambetu estatal, incluyíos aquellos que “quieren facer ver que tan de parte del pueblu” como Podemos ya IX, de la so complicidá col sistema represor y pola so pasividá ante’l tremendu xorrecimientu de la censura a artistes, cantantes, escritores y xente en xeneral.

Especialmente emotiva foi la intervención de Nyto Rukeli, raperu asturianu acusáu como Valtonic poles lletres de los sos cancios y que tien pendiente’l xuiciu nel que y piden 3 años de conderga por dicir la verdá. “La xente nun tien miéu a un raperu faiga un canciu contra políticos o esplotadores, la xente tien miéu a segur esplotao o en paro… tienen mieu a falar, a falar claro, a siguir en paru o tener un trabayu basoria tola vida, a nun tener pensiones, a que la policía nos abra la cabeza nuna manifestación por reivindicar drechos básicos, a too eso, a la miseria o a no tener un futuru ye a lo que la xente tien miéu” .

Llucía F. Marqués

This work is licensed under a Creative Commons Attribution 4.0 International License.