Los ecoloxistes tarrecen qu’esti nueu escape vuelva quedar impune

La nube foi percibía por miles de vecinos d’Avilés y Castrillón mientres una hora, siendo’l so fuerte golor lo que más esmolición xeneró ente la población.
Esti ye un fechu que se vien repitiendo de cuti , dende’l Coleutivu Ecoloxista d’Avilés denuncien que “Cuando nun ye una nube, ye una fuga, o un arramáu, nun hai mes que nun haiga un acidente en dalguna de les instalaciones industriales de la contorna” y desixeron a la Conseyería d’Infraestructures, Ordenación del Territoriu y Mediu Ambiente del “Principado” que se sancione al responsable del nuevu escape tosicu.
La dificultá finca na falta de datos en continuu de les estaciones privaes y l’estratéxicu allugamientu de les públiques, que faen posible qu’esti tipu de fechos nun queden correchamente rexistraos, lo que fai tarrecer que nuevamente nun tean consecuencies llegales sobro los culpables.
Los neños son, xunto coles muyeres preñaes, los enfermos y les persones mayores, la población más vulnerable a los efectos d’esti tipu de contaminación. Amás, comprebóse que los picos de contaminación atmosférica disparen los ingresos hospitalarios n’Asturies por enfermedaes respiratories, d’alcuerdu a un estudiu epidemiolóxicu realizáu pola conseyería de Sanidá del “Principado” d’Asturies y presentáu l’añu 2016.

This work is licensed under a Creative Commons Attribution 4.0 International License.