Tola nuesa vida ta programada
David Marqués García
Desque nacemos, métennos na escuela, nun sistema educativu que más se paez a una fábrica qu’a un llugar onde aprender a vivir. Depués, en pasando polos procesos de programación de la fábrica que ye la escuela, pasamos al bachilleratu. Cuando acabamos d’estudiar, pasamos a tar programaos nel nuesu trabayu. Entres a tal hora, sales a tal hora. Tol añu igual. Dempués del trabayu, los vienres y les fines de selmana, a espotrexar del trabayu colos amigos mientres te gastes el dineru que ganasti en cerveza o en ver el fúbol. ¡Hasta’l sesu se programa! Tenemos unes perguapes aplicaciones pal móvil onde podemos decidir, en base al físicu, si una persona nos gusta o non pa echar un polvu. Si nos presta y la cosa furrula, quedamos, falamos un ratu y depués a dalgún sitiu más o menos escondíu y a echar un polvu. ¿Ónde quedó la naturaleza cola so espontaneidá? ¿En qué momentu camudamos los nuesos celebros por ordenadores? A la fin va ser ciertu que tamos en Matrix, y que tou ye mentira.
¿Dende cuándo la naturaleza sigue los mesmos ciclos pel branu que pel iviernu? Pel iviernu ralentízase tou, los animales duermen más, dalgunos hasta se pasen tol iviernu trabayando…quería dicir, durmiendo… anque sí ye ciertu qu’hai un animal que se pasa tol iviernu trabayando como si fuera branu. Llámase humanu, y considérase superior por non respetase a sigo mesmu y por dixebrase de los ciclos del planeta nel que vive.
Si pel iviernu hai menos hores de sol, ye normal que se duerma más, polo que la lóxica dicta que tendría d’haber horarios más curtios. Nun voi dicir que tenga que ser desque’l sol sale hasta que se pon, pero sí que, por poner daqué más fixu, dende les 10 de la mañana (que se llevanta’l sol n’avientu o xineru) hasta les 4 de la tarde, que ye cuando entama a atapecer. Lo que nun tien nengún sentíu ye que nos tengamos que llevantar a les 7 de la mañana, n’escuridá absoluta, pa poder llegar a currar a les 8 ó 9, y que salgamos d’esi mesmu curru a les 5 ó 6 de la tarde, tamién n’escuridá absoluta… Si ponemos un pocu estrictos, tendríamos d’espertanos col sol y chanos con él tamién, esto ye, agora en febreru llevantanos sobre les 8 am y chanos sobre les 7 pm, más o menos. Ehí entra’l que cada unu seya un animal más diurnu o nocherniegu, y que s’acostumara más a dormir de díe o de nueche.
Volviendo a otres temes de programación: La programación invadió a tal puntu les nueses vides que yá nun hai casi nada espontaneo. Esti día lleí un artículu sobre que les pareyes en Xapón tienen menos sesu. ¿Cómo pue ser eso? porque « nun hai tiempu » Y nun hai tiempu significa: tener sesu de verdá implica romper tolos programes. ¿Cómo vamos llegar puntuales a la cita colos amigos del vienres si tamos esfrutando del sesu y el tiempu para d’importanos? Porque cualesquier que tuviera bon sesu sabe que cuando lu ties, el tiempu fúndese, tórnase nuna cosa que nun esiste. Sume. Asina que nos llindamos a relaciones superficiales d’una nueche, onde esi tipu de sesu que difumina el tiempu y ruempe los esquemes nun esista. P’asina poder siguir coles nueses vides monótones y programaes ensin que nada les fadie.
Sinceramente, toi cansáu d’eso. Quiero que volver vivir esa espontaneidá propia de la vida. Quiero que’l programa que me dirixe se difumine adulces, pa que finalmente, seya llibre.
This work is licensed under a Creative Commons Attribution 4.0 International License.
