Tres d’ochenta años ensin percorrer les cais de la ciudá, la mazcarada recupera los sos presonaxes más emblemáticos de la man de Paraísu Llocal Creativu
Más de venti antroxaos, acompangaos colos músicos de Los Gascones, percuerren estos díes les cais más céntriques d’Uviéu, nuna aniciativa que va permitir que La Destrozona o los Zaparrastros tornen a pasiar pela capital d’Asturies tres d’ochenta años, recuperando l’Antroxu tradicional.
La comparsa ya salió’l Xueves de Comadres peles cais del Antiguu, el Sábadu Frixueleru ya’l Domingu Larderu. El so caberu desfile (pa esti añu) sedrá mañana, Martes d’Antroxu de magar les ocho la tardi, coincidiendo col Entierru la Sardina. D’esta mena, Paraísu Llocal Creativu recupera per primer vegada en muncho tiempu n’Asturies una mazcarada urbana, los Mazcaritos d’Uviéu.
Esta ye la puesta en práutica d’una iniciativa perguapa que lleva años de trabayu, cola que se pretende recuperar y afitar l’Antroxu tradicional y, de pasu, algamar que, col tiempu, sía’l referente de la ciudá .
La idega de recuperar esti Antroxu ñació hai años na Llibrería Paraxuga, como propuesta de la so propietaria, Dulce Xil, que-y treslladó a Anxel Nava lo guapo que sedría recuperar una tradición que ca vegada deriva más en vezos foriatos. “Foi hai unos seis años y la idea quedó ehí”, señala l’artista, qu’a lo poco comenzó a estudiar documentos históricos y a recoyer información oral, escasa en dambos casos.
D’unos y otros consiguióse la información pa definir dellos presonaxes, como’l Neñu, La Rollona, los Sábanos, “fechos con sábanes y cobertores”, como se pueden ver nel históricu cuadru sobre los Mazcaritos d’Uviéu d’Evaristo Valle, o los Zaparrastros, “vistíos con sacos y que lleven esquiles”, asemeyaos a los d’otres mazcaraes, la madame y el madamu, el cura y el diañu, arriendes de los más típicos d’Uviéu: los soldaos, y La Destrozona, “un home antroxáu de muyer que lleva escoba y ye’l más provocador”.
Esta ye la puesta en práutica d’una iniciativa perguapa que lleva años de trabayu, cola que se pretende recuperar y afitar l’Antroxu tradicional y, de pasu, algamar que, col tiempu, sía’l referente de la ciudá .
This work is licensed under a Creative Commons Attribution 4.0 International License.
