El movimientu a favor de los drechos llingüísticos de los asturfalantes continúa sumando encontos

Avilés ye’l conceyu que se vien a amiestar a la llucha pola Oficialidá, col ñacimientu d’una asociación qu’aconceya a los avilesinos en llucha polos drechos llingüísticos del país.

Seique la primer convocatoria fore el miércoles 14 de Marzu a les 7 nel Palaciu Valdecarzana, cambeos de caberu intre faen que se vaiga celebrar el mesmu díe, pero nel Centru de Servicios Universitarios d’Avilés, allugáu na cai La Ferrería, 7, de magar les 19:30 la tardi.

Nesti actu, amás de presentar los oxetivos de la ROCA, fadrán un fonderu analís de les llinies xenerales del modelu d’oficialidá afayaízu p’Asturies, el procesu que tien de ponese en marcha pal algame de dicha oficialidá y el papel que tien de xugar el movimientu social de reivindicación nesti procesu.

Na presentación cuntarán coles intervenciones de Xosé Ramón Iglesias, Secretariu de l’Academia de la Llingua Asturiana, Xosé Candel, de la Xunta pola Defensa de la Llingua Asturiana, Sabel Tuñón, d’Iniciativa pol Asturianu y Alexia Fernández, de la Rede pola Oficialidá de la Contorna d’Avilés.

Redaición InfoAsturies

This work is licensed under a Creative Commons Attribution 4.0 International License.