Cola pancarta “Escontra les violencies machistes” per delantre y decenes de llazos moraos, el collor que simboliza la llucha de la muyer, centenares de presones participaron na tarde d’ayeri na concentración convocada pol Movimientu Feminista d’Asturies pa reclamar la fin de la violencia escontra les muyeres.
Sonia D. González, responsable de la estaya de Muyer y Reciella d’A.A, declaraba a la fin de la concentración: “Nun ye violencia ensin más, estes agresiones afítense nuna cultura patriarcal sofitada pol estáu y los sos medios que consiente la consideración de les muyeres comu meru oxetu y nun apurre una vraera proteición a les víctimes. Ye preciso que la sociedá asturiana entera tome conciencia del problema y homes y muyeres trabayemos xuntos pa crear una sociedá igualitaria na que naide tea que vivir con mieu.”
El Pactu Social escontra la Violencia sobre les Muyeres del “Principado” nun dexa de ser, fasta l’intre, papel, y les muyeres siguen alcontrándose con hores d’espera a la hora de denunciar y en dellos casos entrugues improcedentes y comportamientos pocu profesionales por parte de los que deberíen asesorales. Eso, xunío a la inoperancia de los medios de proteición y la llentitú del procesu, xúnese al mieu d’empeorar les coses pa quitar a munches muyeres la idega de denunciar. Sicasí, la denuncia inmediata ante’l primer maltratu ye l’únicu camín viable pa qu’una muyer salga del abusu.
“Si nun denuncies la primera vez tórnase tou escontra una” relata N.G.M, víctma violencia de xéneru “Yo cometí esi fallu, pero denunciar ye quedar sola, ye destapar, los nenos queden espuestos a que el yos pueda facer algo. Nun se puede denunciar y marchar pa casa porque el vendrá a por ti. Dícenlo muy guapo pero nosotres sabemos a quién tenemos en casa. A mí la jueza de Xixón tratome como a una delincuente, salí del xulgau creyéndome basura, tenía grabaciones d’elli amenazándomos y nin les escucharon.” La so hestoria fina con un sospiru de resignación “Yo tuvi suerte, elli permitióme seguir viviendo”.
N’Asturies recuéyense una media de tres denuncies diaries por violencia escontra muyeres y a fin d’añu rexistrábense un total de 1.169 muyeres “con riesgu d’agresión” Dos d’elles alcuéntrense no que se noma “riesgu estremu”, lo que quier dicir, llanamente, que tienen munches posibilidaes de ser asesinaes. Otres dos figuren como “riesgu altu” demientres que 84 son calificaes de ‘riesgu mediu’ y 353 de ‘riesgu baxu’. Los 728 casos restantes tienen abondes posibilidaes de ser agredíes, pero como nun s’alvierte peligru direutu de muerte, considéraseyos de “riesgu non apreciáu”. Les tres muyeres que se mataron el caberu añu nun teníen consideración de riesgu
This work is licensed under a Creative Commons Attribution 4.0 International License.
