El denunciante foi l’encargáu de MANGO, quien el díe de la fuelga trató de torgar la llabor de los piquetes informativos, llegando a agredir y persiguir a les agora acusaes

Demientres tola xornada del 8M foron asgaya les muyeres que salieron a la cai, como correspuende a una fuelga d’esta triba, faciendo piquetes informativos per delles llocalidaes, pente elles, Xixón. Un ensame de muyeres percorrieron decenes d’establecimientos repartiendo panfletos informativos a les trabayaores sobre’l so drechu a la fuelga y coreando conseñes feministes y de clas.

La xornada trescurrió ensin incidentes fasta la llegada a la tienda de MANGO, onde l’encargáu quiso torgayos la entrada, increpando y agrediendo a les muyeres que trataben de repartir los papeles. Una vegada abandonáu el llocal, esti home persiguió a les muyeres del piquete durante más d’una hora, sacándoyos semeyes. Non contentu con esto, dio avisu a la policía, lo que derivó na acusación de “atentáu contra los drechos de los trabayaores” polo qu’una de les participantes foi detenía nel so propiu domiciliu na mañana del xueves.

Una concentración espontanea de cientos de persones acompangó a la detenía a la entrada de la comisaría de policía, amosando la so refuga ante la criminalización de la protesta y a la persecución policial a les compañeres.

Dende la CNT, organización a la que pertenecen les acusaes, quieren esclariar que “nenguna agresión machista, como la sucedía la mañana del 8M por parte del encargáu de MANGO, va a parar la nuesa llucha; tampoco les intimidaciones en comisaría por parte de la policía, ni la represión a la que se tán viendo someties en diferentes coleutivos. Si toquen a una, tóquenmos a toes”.

Redaición InfoAsturies

This work is licensed under a Creative Commons Attribution 4.0 International License.