Cuatro actos de protesta nel fin de semana, 11 nuna semana; l’aprietada axenda reivindicativa asturiana espeya el malestar social que se carez nel país y la toma de conciencia por parte del pueblu asturianu de la necesidá de movilizase pa camudar la situación
El miércoles 14 de marzu una concentración na plaza Conceyu de Xixón denunciaba la especulación urbanística qu’escuende la propuesta de Ciudadanos de derribar l’edificiu de La Sindical, al mesmu tiempu que nel interior de la Casa Conceyu aldericaben sobre la cuestión.
El xueves 15 surdió de manera espontánea una concentración masiva delantre de la comisaría de Xixón, por mor de la detención ya interrogatoriu esi mesmu día de tres muyeres participantes nos actos del 8 M.
El mesmu 15 de marzu l’acampada de la PAH na oficina de Liberbank consiguió algamar un alcuerdu de negociación que permitiere frenar el desallugu d’una pareya pol aval prestáu al so fíu na hipoteca.
El vienres 16 n’Avilés tuvo llugar una nuea concentración en defensa de les muyeres: contra les violencies machistes, les agresiones, l’acosu, les desapaiciones, por midíes que torguen tou eso ya escontra’l patriarcáu
El sábado diecisiete foi triple sesión: pela mañana l’impresionante manifestamientu desixendo pensiones dignes, enturbiá namás pol enfotu de ponese en primer llinia los representantes de los mesmos sindicatos que propiciaron la llaceriosa situación llaboral que se carez n’Asturies, lo que prevocó protestes asgaya pente los asistentes.
Alrodiu de 40.000 persones de toles edaes percorrieron les cais de Xixón nuna marea qu’aconceyaba estremaos movimientos ciudadanos, como feministes, estudiantes, pensionistes y colleutivos poles llibertaes, amosando qu’esta ye una tema que cinca a tola sociedá asturiana.
De tardi, na Plaza Conceyu de Xixón, XEGA -coleutivu asturianu qu’agrupa a llesbianes, gais, transesuales y bisesuales- revindicó nel díe de la visibilidá trans, el reconocimientu llegal y social del autodetermín de xéneru, y l’aplicación de les lleis vixentes, sobre tou nos casos d’agresiones, curiando que se tea en cuenta l’agravante por motivos d’identidá de xéneru, tal comu afita’l códigu penal.
Entantu, na Plaza la Escandalera d’Uviéu, la plataforma “Nun somos delitu – Asturies” cellebraba una concentración escontra la llei mordaza y l’ausencia de llibertá d’espresión impuesto pol estáu español. Nella denunciáronse les miles de sanciones, les decenes d’imputaos y les detenciones pol usu de la llibertá d’espresión (incluso a periodistes por informar) y los abusos policiales.
El domingu l’escenariu tornó a ser Xixón, con otru multitudinariu manifestamientu nel que más de 6.000 asturianos reclamaron el drechu a alendar ensin pelligru, baxo’l llema “Asturies Paraisu contamináu.
Depués del fin de semana, les convocatories continuén cola concentración güei n’Uviéu escontra’l racismu institucional. Sedrá a les 7:30 la tardi, na Plaza Conceyu d’Uviéu.
Mañana, descansu, pero el miércoles vuelve a entamar cola convocatoria de SUATEA pola presencia d’enfermeros escolares nos cientros d’educación especial, a les 18:30 nel Rexistru Xeneral d’Uviéu ya’l xueves la semanal concentración de pensionistes na plaza Conceyu de Xixón.
Llucía F. Marqués
This work is licensed under a Creative Commons Attribution 4.0 International License.
