www.lesfartures.com
Mieres declara la Sidra bébora oficial del so conceyu y ye noticia nos periódicos; La Fundación Principe d’Asturies ufre nel so convite a los premiaos, Vinu “Rioja” y Cava Catalán y nun sal en nengún periódicu.
Ésta ye l’Asturies onde vivimos. Onde’l nuesu “Principado” y la mayor parte les Cases Conceyu organicen actos con “vino español” Rioja mientres se-yos llena la boca (ya’l bandullu) en Fitur y delles feries asoleyando’l vinu y la sidra asturiano.
O espabilamos, o perdemos esta partida. Y vamos camín d’ello: yá atopo más sidra vasca o gallega qu’asturiana nes grandes superficies. Hai sidra en munchos paises, pero somos l’únicu país del mundiu que la echa, y tamos perdiéndolo. Cada vegada cuesta más atopar una sidrería onde echen la sidra mientres comemos; y si nun la echen ye casi imposible alcontrar una carta con Sidra de Mesa, Espumosa, de Xelu o Aguardiente de Sidra; toes con dellos premios internacionales.
¿Por qué nun ye posible n’Asturies entamar una comida tomando unos culetes (o culinos. Culines enxamás), sentase a xintar con sidra de mesa o brut y finar la cena con un clin de Sidra de Xelu o Aguardiente de Sidra? Voi por dellos restoranes y mirenme con cara raru cuando-yos entrugo por estos productos, pero a la vegada ufierten vinos de 30 D.O.P.s distintes del mundiu.
Amás, les mires curties que tenemos pal marketing. De xuru que nun vais a Murcia (por poner un exemplu) a pidir sidra asturiana, pero na mayor parte los restoranes asturianos ye más fácil atopar Vinu de Murcia que sidra de xelu. Algo tamos faciendo mal.
This work is licensed under a Creative Commons Attribution 4.0 International License.
