L’Antroxu asturianu entemez tradición propio con ayeno nun exerciciu de surrealismu prestosu mui afayaizu pa esta folixa
Desfiles de corte brasileñu con Rodrigos Cuevas, Galianas esplumosos a tou volumen, gaites a ritmu de samba, sátira política y crítica social dándose la man con presonaxes de debuxos animaos, mazcaritos recuperaos de los cuadros d’Evaristu Valle entemecíos con milenta pirates, urdangarines presos, payasos, superhéroes o la moda infantil del añu: los colloríos trolls. Por supuesto, que nun mos falte la sardina, esti añu en Xixón, por duplicao.
Cualesquier cosa con tal de facer xaréu, de provocar, de rise de tou un pocu y ser otru, otra, otra cosa, otra cara: nun hai sitiu pa la vergoña, ye Antroxu. De postre, como non, frixuelos.
De Comadres a Martes d’Antroxu, pasando pel Sábadu fayueleru, domingu lardeiru, ya’l llunes gordu, cuasique una selmana dedicada a la ilusión ya l’esperpentu. Sicasí, a dalgunos entá nun yos algama y son dellos los pueblos qu’allarguen la folixa dica la selmana que vien: Mieres, Uviéu, Villaviciosa y Avilés son dalgunes de les poblaciones nes que podremos siguir antroxando si’l cuerpu entá mos pidi xaréu.
This work is licensed under a Creative Commons Attribution 4.0 International License.
