Los xuristes coinciden en que la Llei d’Usu ta desfasada y la Oficialidá ye’l camín que marca’l xacíu
Xuristes de renome xuntáronse nel Campuamor nun actu entamáu pola Conseyería d’Educación y Cultura por mor del venti aniversariu de la Llei d’Usu y Promoción del Asturianu.
Na mesa reonda, entitulada ’20 años de la Llei d’Usu y Promoción del Asturianu’, intervinieron Don José Manuel Pérez Fernández, lletráu del Tribunal Costitucional y profesor de Drechu Alministrativu de la Universidá d’Uviéu; Leopoldo Tolivar, caderalgu de Drechu Alministrativu de la Universidá d’Uviéu; y l’abogáu Nicolás Bartolomé.
La conclusión d’estos xuristes tres d’aldericar sobre’l presente, pasáu y futuru de la nuesa llingua y valorar toles posibles vies p’afitar la so pervivencia y los drechos de los asturfalantes foi que la falta de desendolcu real de la Llei d’Usu y Promoción del Asturianu o los problemes pa la so aplicación nel ámbitu de los Conceyos ta faciendo que la única solución “posible y llóxica” seya la declaración d’oficialidá de la llingua asturiana.
De fechu esta llei, que ñació ya con vocación de fracasu como mediu p’apanguar les desixencies llingüístiques del pueblu asturianu, valió pocu más que p’avanzar un pocu nel usu la toponimia tradicional, pero ensin abarcar siquier el conxuntu’l territoriu y de manera tan feble que nin los medios de comunicación asturianos nin la mesma alministración que los apreba nun yos da lluéu usu a los nomes correchos.
Pente los principales aspeutos incumplios nesta llei, comu destaca la XDLA nes sos declaraciones, ta el derechu de los ciudadanos a dirixise a l’Alministración na so llingua materna, otru de los aspeutos recoyíos pola norma que nun se cumple cuasique nunca y la promoción de la industria cultural n’asturianu recoyía esplicitamente nesta llexislación; les aides nesti campu non solo nun medraron, sinon que’l presupuestu dedicáu a la lliteratura y música n’asturianu amenorgóse dende 1998 nun 75 por cientu, desapaeciendo dafechu les aides a la produción audiovisual. Nel ámbetu educativu, la ufierta n’asturianu sigue ensin tar xeneralizada, siendo cuasique inesistente na concertada, teniendo que lluchar les families en munchos casos pa exercer el so drechu a la mesma.
Nuria Prendes
This work is licensed under a Creative Commons Attribution 4.0 International License.
