Na quinta edición d’esti certame, nel que s’escueye la meyor sidre nuevo del añu nel momemtu mesmu en que s’inaguren les colleches, participaron 45 llagares, siendo escoyía la sidre Riestra como la meyor. Toles sidres participantes y munches más tarán presentes na Primer Sidre l’Añu esta selmana santa

El segundu puestu foi pa la sidre del Llagar de Cabueñes ya’l terceru pa Cabañón. Tamién finalistes fueron La Morena y Orizón -empataes en cuartu llugar-, Arsenio, Piñera, Peñón y L’Allume, que quedaron n’orden de quinta a ochava, respeutivamente.

“Toi mui contentu, cola competencia que hai güei díe nel mundiu la sidre, esti reconocimiento ye importante, estupendu pa entamar bien l’añu” manifestó Raúl Riestra, llagareru ganaor, qu’apuntó que la so sidre por ser entá tan moza ye enforma afrutado y fae bon vasu.

La decisión tuvo enforma reñía ya’l xuráu, presidíu por Manuel G. Busto, y constituyíu por Armando Loredo, Manuel Castro, Donato Xoaquín Villoria, Eloy Gómez y Ricardo García6, pasó seies llargues hores de tastia y valoración de les sidres, anantia de dar el so veredictu, ya que si bien na preescoyeta se suponía que sedríen 5 namás les finalistes, l’empate a cuatro fizo pasar a nueve llagares a la fase final. Riestra algamó 78 puntos, Sidra Cabueñes 76, y sidra Cabañón 72.

D’esta manera, sidra Riestra convirtióse na sidra oficial de la IX edición de la Primera Sidre L’Añu, la espicha más grande d’Asturies y que marca l’empiezu de la temporada sidrera, del 29 de marzu al 1 d’abril nel Muséu del Pueblu d’Asturies en Xixón

El premiu a la Meyor Sidre l’Añu ye l’únicu concursu que tien como protagonista la sidra ensin trasegar y que tien retribución económica –1.000 euros en sidra–. Por esti motivu asitióse como un de los concursos de referencia de la nuesa bébora tradicional, siendo’l segundu en cantidá de llagares iscritos.

El certame, entamáu pola revista LA SIDRA y la FUNDACIÓN ASTURIES XXI, tuvo llugar na sidrería xixonesa La Montera Picona, de manera abierta al púlicu, pudiendo tastiase les sidres participantes a la fin del concursu. Dende va nueve años LA SIDRA y Fundación Asturies XXI entamaron a trabayar pola recuperación de la sidra sobre la madre que prácticamente sumiera del mercáu pola industrialización de los llagares y l’aplicación xeneralizada de los trasiegos. Cada vez son más los llagares que s’animen a comercializar esti tipu de sidra y que participen nesti certame.

Redaición InfoAsturies

This work is licensed under a Creative Commons Attribution 4.0 International License.