Ente los alcuerdos más importantes qu’adoutaron ta’l de desixir una mesa de negociación pa tratar los serios problemes llaborales a los que los docentes s’enfrenten, reclamar la igualdá efeutiva de tratu y d’oportunidaes ente muyeres y homes y l’incorporación d’enfermeros escolares nos Cientros Públicos d’Educación Especial, asina comu l’amenorgamientu del ratiu d’escolinos con necesidaes educatives especiales por clas y la meyora de la formación de siguío

L’importante deterioru nes condiciones llaborales de los docentes, xustificáu primeramente nun contestu de crisis económica y como una midía temporal, pero que sigui seis años dempués, fai urxente l’apertura d’un procesu de negociación que dexara torgar los efeutos negativos de la normativa estatal.

El II Alcuerdu pa la Meyora del Emplegu Públicu robláu’l pasáu 9 de marzu supón un puntu d’inflesión y tien de valir pa siguir costruyendo un nuevu y meyor marcu pa les condiciones llaborales de los docentes asturianos nun futuru yá inmediatu, una y bones el cumplimientu de les desixencies no que cinca al déficit per parte de Asturies yá nun hai sida pa la non apertura d’una Mesa de Negociación na que recuperar la xornada llaboral de los docentes asturianos, doblemente castigaos pol aumentu d’hores lleutives y complementaries. Apocayá un empreslle de los sindicatos d’Ensiñantes reclamaba la recuperación darréu d’esti derechu.

Esiste amás un gran malestar ente’l profesoráu de tolos niveles pol xorrecimientu de les xeres burocrátiques y alministratives que se-yos desixen dende l’Alministración, que suponen una carga de trabayu descomaná y práuticamente inasumible que va medrando añu a añu y ye necesario desaniciar.

No que cinca a la igualdá, destaquen que magar la creencia de que na Función Pública Docente nun hai discriminación por mor de sesu, cuestiones como la fienda salarial, el techu de cristal, suelu pegañosu, etc. tán bien presentes nun seutor, como ye l’educativu, mayoritariamente feminizáu, como amuesen los datos porcentuales que falen del repartu del profesoráu asturianu.

Faen tamién un llamamientu a la incorporación d’enfermeros escolares, una y bones los Cientros Públicos d’Educación Especial acueyen a una gran diversidá d’alumnáu con graves problemes de salú, medicaciones cróniques, alerxes alimentaries, trestornos d’ansiedá, sicóticos, depresivos y/o rellacionaos con acontecimientos traumáticos… amás d’una mayor  incidencia d’enfermedaes comunes, periodos más llargos de afeutación de les mesmes y necesidá d’una mayor prevención y control de los síntomes y curiaos, polo que se fai imprescindible un mayor control mélicu de los mesmos.

Redaición InfoAsturies

This work is licensed under a Creative Commons Attribution 4.0 International License.