Una encuesta de la Conseyería de Sanidá amuesa que la precariedá económica del pueblu asturianu lleva el frio al seis por cientu de los llares

El 6% de les families declaren que nun pueden permitise prender les estufes nin nos díes más frios y más del 4% reconoz tener problemes pa pagar les factures de lluz, agua y teléfonu. N’abondos llares la privación llega a la falta d’agua caliente y nos casos más estremos a la ausencia de medios pa cocinar. La situación agravóse tres de les fuertes subíes de les tarifes lléutriques demientres los díes de mayor frio en febrero y ye previsible qu’empiore ante los camudos del bonu social introducios por edp y que fadrán que munches families pierdan esti sofitu económicu pal pagu de la lluz.

El problema nun se reparte de manera uniforme, afeuta con más dureza a les families monomarentales, ye más avezao nes ciodaes -onde se concentra la mayor precariedá de les viviendes- que nel mediu rural y pente families con pocos estudios, siendo’l factor determinante la falta de trabayu o los emplegos precarios de los pas y mas.

L’analís de la situación revela alteraciones na salú de los encuestaos en función d’esta esposición al frio, siendo importantes los problemes derivaos de la humidá y les baxes temperatures pente la reciella d’ente cero y catorce años.

Llucía F. Marqués

This work is licensed under a Creative Commons Attribution 4.0 International License.