En contra del dictame unánime del so propiu Comité Científicu, el Ministeriu de Mediu Ambiente refuga clasificar l’ocalitu como planta invasora
L’ocalitu vuelve quedase fuera del Catálogu Español d’Especies Esótiques Invasores. La industria papelero (a onde va parar cuasi la tercer parte de la produción d’esta especie arborícora) pue alendar tranquila: el gobiernu d’España nun-y quitará la so fonte de materia prima.
La inclusión del ocalitu como planta invasora implicaría midíes pa erradicar estes especies, qu’ apurren el 32% de la madera que consumen les industries papeleres nacionales.
L’informe emitíu n’avientu del añu pasáu pol Comité Científicu del Ministeriu d’Agricultura y Pesca, Alimentación y Mediu Ambiente foi contundente, definiendo ensin llugar a duldes el calter invasor d’ocalitu y encamentando la so inclusión nel Catálogu d’especies Esótiques Invasores.
El comité, formáu por espertos ecólogos, biólogos y botánicos independientes, encamentó espresamente llevar a cabu midíes de desaniciu primero que se produza la invasión siempres que se repare naturalización de cualisquier especie de Eucalyptus nel nuesu territoriu. Asina que’l gobiernu español encargó otru informe, nesti casu al inxenieru de monte Luis Alfonso Gil, de la Universidá Politécnica de Madrid, quien afirma que “considerar a estes especies como invasores y bloquiadores de los ecosistemes ye una prueba más de la inmadurez y desinformación de la sociedá actual”, informe esti caberu que si foi teníu en cuenta pa la declaración del ocalitu como planta non invasora.
El sistema d’ignorar a los mesmos espertos nun ye nuevu: yá nel añu 1989, la mesma Conseyería d’Agricultura y Pesca d’Asturies reconocía la perniciosidá del ocalitu y la comeniencia d’acutar el so cultivu, ellaborando un documentu públicu entituláu “Restriciones a que tienen de sometese los plantíos d’ocalitu n’Asturies”, nel que s’afitaba una llende del 4% de la superficie pal cultivu del ocalitu. Sicasí anguañu más del 25% de la superficie arbolada d’ Asturies correspuende al ocalitu, un total de 80.000 hectarees.
L’ocalitu ye una especie esótica procedente d’Australia ya’l so monocultivu supón un dañu medioambiental inxente, favoreciendo l’entamu y l’espardimientu de les quemes forestales, por cuenta del gran altor qu’algamen estos árboles en pocu tiempu y a la fácil combustión de la so maera, costituyendo un competidor esquilmante pa la tierra y el restu de flora. El plantíu d’ocalitu provoca amás la destrución de la fauna y de la flora natives (por cuenta de los sos compuestos terpérnicos que tienen un altu poder antixerminante, anulando’l desendolcu embrional de les granes que puedan cayer embaxo y tamién la flora bacteriana y fúnxica, convirtiéndolo n’ermo) y el so cultivu estropia los acuiferos, tantu pola so alta necesidá d’agua como pol usu de pesticides tósicos nel so cultivu.
Llucía F. Marqués
This work is licensed under a Creative Commons Attribution 4.0 International License.
