El Cientru Social la Xusticia convoca una campaña d’apostasía en refuga pa col catolicismu

Col envís d’amosar a la ilesia católica el xorreciente descontentu de los asturianos pa con esta organización relixosa, que nos caberos años protagonizó abondos escándalos sesuales ya económicos, posiciónandose d’avezu col sector más facista de la sociedá, el CSOA La Xusticia pon en marcha una campaña d’apostasía baxo’l llema “Nun tas mui católicu? Sal de la ilesia”. Nella apúrrese información de como dexar de cuntar pente los fieles de la ilesia católica en tres cenciellos pasos que culminen cola visita conxunta de tolos participantes na campaña a entregar los sos papeles d’apostasía nel arzobispáu.

Hestoricamente la población d’Asturies destacó por ser pocu creyente, “Asturianu mal cristianu” diz el dichu. Nos caberos años el porcentaxe de creyentes y más entá el de prauticantes amenorgó llamativamente, siendo la penúltima fastera del estáu español (depués de Catalunya) n’asistencia a mises.

Sicasí, la mayor parte de los asturianos son oficialmente católicos por bautismu.  Alrodiu del 60% de los ñacios n’Asturies son bautizaos pola ilesia. El porcentaxe de comuniones baxa de tala mena que namás ún de cada cinco bautizaos comulguen al aportar a la edá y munchos menos se confirmen. Menos del 35 % de les pareyes que se llegalicen como matrimoniu faenlo pasando pela vicaría y l’enterramientu ye l’únicu sacramentu que caltien “bones” cifres, con un 73% de les esequies a traviés del ritu canónicu.

Nuria Prendes

This work is licensed under a Creative Commons Attribution 4.0 International License.