Güei entama’l xuiciu a 8 mozos acusaos de terrorismu por mor d’una engarradiella de chigre nes fiestes del pueblu. Lleven 518 díes de prisión preventiva por daqué que’l mesmu Maxistráu eméritu del Tribunal Supremu d’España define como un delitu menor “Incuestionablemente, esto nun pasa de ser un delitu de mancaures y, como muncho, desordes nun llocal públicu”

Arriendes de los fechos acaecíos na madrugada del 15 d’ochobre del 2016 nun chigre de la llocalidá d’Altsasu, once mozos del pueblu foron imputaos por actos de terrorismu y siete d’ellos encarcelaos provisionalmente. Lleven más de 500 díes na cárcele.
La fiscalía demanda pa ellos un total de 375 años de prisión por “delitos de mancaura y menacies de calter terrorista” por una engarradiella de chigre nes fiestes del pueblu, con dos guardies civiles fora de serviciu.

En resume, la práutica totalidá de los presentes nel chigre trataron de facer entender a los guardies civiles que la so presencia nun yera bien recibíaa, animándose-yos a abandonar l’establecimientu, lo que desaguó nuna engarradiella na que “un de los atacaos finó por cayer embaxo”, ensin consecuencies médiques de mayor importancia. El xuiciu contra ocho d’ellos arrinca güei nes dependencies de l’Audiencia Nacional de San Fernando d’Henares nun escenariu que fai tarrecer a les families de los deteníos lo peor: pruebes inadmities, una xueza venceyada familiarmente a la Guardia Civil, informes contradictorios, manipulación mediática…

La calificación xudicial de los fechos como delitu de terrorismu y la falta de proporcionalidad esmolez a amplios seutores de la sociedá, una y bones la interpretación estensivo y arbitrario que se ta dando a esti conceutu n’esti y en munchos otros casos de recién vulnera les llibertaes y xenera sentimientu de miéu ya indefensión pente los ciudadanos.

La mesma Amnistía Internacional va tar presente como observadora nel xuiciu de Altsasu na Audiencia Nacional tras declarar que “Los cargos de terrorismu tienen de ser retiraos” y que  yos esmolez “Que nun s’aceutaren prebes que son importantes pa les defenses.”
Les manifestaciones en sofitu a los mozos que tuvieron llugar en distintes ciudaes axuntaron a cientos de miles de persones, anque nun recibieron l’atención mediática correspondiente.

Llucía F. Marqués

This work is licensed under a Creative Commons Attribution 4.0 International License.