Anantes de la crisis, 8 de ca diez asturianos ensin emplegu cobraba dalguna prestación. Güei, namás cinco de ca diez homes y cuatro de ca diez muyeres cuenten con esta proteición por desemplegu

La situación crítica na que viven munches families, con ún o dellos o tolos sos miembros en situación de desemplegu (por ciertu, estos caberos más ca vegada) agrávase colos recortes en cobertura que dexen n’Asturies un panorama esmolecedor. Un 52% de los paraos del país nun cobren dala prestación de desemplegu, lo que fai un 20% menos de tasa de cobertura que nel 2.012.

La tasa de cobertura calcúlase dividiendo el númberu de perceptores de dalguna prestación pente’l númberu de presones desemplegaes, pero ensin tener en cuenta a aquelles que nun tuvieron entá dengún contratu. N’Asturies esta cifra da un datu averáu al  46%, ello ye, más de la meta de los asturianos que tan en paru nun lo cobren, siendo esta situación enforma más grave pente les muyeres, ya que namás el 40% perciben daqué.

L’aumentu del paru de llarga duración, con un 53,1% de desemplegaos con más d’un añu a la gueta de trabayu ye un de los factores que desplica esti problema, xunto colos trabayos d’alta precariedá y baxa duración que faen abegoso cotizar abondo pa tener drechu a un subsidiu.

Estes cifres coloquen a Asturies mui perbaxo del Estáu Español, con una tasa de cobertura del 58 %, con comunidaes -comu ye’l casu de Baleares- nes que’l 88% de la población desemplegada cobra el paro. Amás, esta desemeyanza paez dir xorreciendo según se va “saliendo de la crisis”, quedando Asturies atrapada nos piores datos demientres se debuxa un escenariu xeneral d’avance, amosando que la tan nomada “recuperación” nun ta sintiéndose n’Asturies comu nel restu d’Europa.

Llucía F. Marqués

.

This work is licensed under a Creative Commons Attribution 4.0 International License.