L’equipu xixonés de balonman Mavi Nueves Teunoloxíes vien de proclamase campeón de la Copa la Reina na final cellebrada en Malaga contra’l Super Amara Bera Bera, nun alcuentru nel que l’equipu asturianu nun dio un respiru a les xugaores vasques

Nel so debú nuna fase final d’esti troféu, les xugadores remataron una temporada espectacular derrotando al Bera Bera de San Sebastián, un equipu con cinco copes de la Reina nel so hestorial.

El Mavi, dirixíu maxistralmente por Marizza Faría, caltuvo en tou intre’l marcaor al so favor, desmoralizando a les vasques que nun consiguieron remontar siquiera demientres les superioridaes poles tres esclusiones del Mavi. Si bien na primer metá tuvieron más igualaes, nel segundu tiempu l’equipu asturianu llevó les riendes del partíu, algamando’l trunfu por 20 tantos a 16 a menutu y mediu del final.

El Mavi defenderá’l títulu en 2019 en Barakaldo, onde’l Zuazo ya ta clasificáu por ser l’entamaor; los dos equipos empataron nos ochavos de final d’esta edición, pero clasificáronse les asturianes por marcar más goles fuera casa.

Nel Dos Santos

This work is licensed under a Creative Commons Attribution 4.0 International License.