La cerveza artesano tá de moda, y pudimos comprobarlo nel pasáu Festival Internacional de Cerveza Artesano de Llangréu a entamos del mes d’Abril. Un fin de selmana pasáu per agua, onde nun paró d’estramazar y sicasí, unes 10000 persones s’averaron a La Felguera a beber cerveza.

Amás, per bona esbilla de conciertos, ensin escaecer los de casa (gracies por Felpeyu y Stukas), y los grandes de fora (Hamlet y Reincidentes).

15 puestos con dalguna de les meyores cerveces del mundiu, como la holandesa De Molen o la navarra Naparbier (amás Napar tien la política de nun repetir festival sacantes esti, que vienen (y volverán) encantaos) y con bona representación asturiana (esperemos qu’haya ainda más). Talleres y charres alrodiu la cerveza (tuvi l’honor d’entamar una charra xunto col gran cocineru David Montes falando -y comiendo, cómo non-, de cerveza y gastronomía) y conciertazos qu’afitaron el FICAL como ún de los meyores festivales d’España.

Salva, y Edu y Pablo de L’Artesana; toos de La Felguera Coleutivu Cultura,  col sofitu de la Casa Conceyu de Llangréu, ficieron un trabayu descomanáu peliando escontra tolo peliable pa que, amás de trayer a los meyores cerveceros, facer que se sintieran na so casa. Y asina foi. Enxamás nun festival, nin nos “grandes del mundiu”, atopamos un sentir tan xeneralizáu de contentu pa cola organización por parte los cerveceros y los asistentes. Lo que n’otru llau del mundiu sería un fracasu por mor d’un Nuberu que nun mos dió tregua, ellos consiguieron que toos nagüemos pel siguiente FICAL.