La situación de la llingua galesa definía por Liz Saville Roberts, de Plaid Cymru, ye perasemeyada a la que vive l’asturianu
Liz Saville defende la inclusión de la llingua galesa comu protexía na llexislación sobro igualdá, a la par de la raza, la relixón o la orientación sesual. Trátase de protexer a los falantes de galés del de la llargamente afitada tradición de descréditu y burlla de la llingua galesa y por estensión de los falantes de galés
“La burlla ya’l ridiculu al que’l galés ta sometíu repetíamente tien un perfondu efeutu. Pás que deciden nun pasar a los sos fios el so propiu idioma, falantes con llercia a usar la so llingua en grupos sociales, la norma social de tornar tou al inglés, rapacinos ensin confianza pa usar el galés fuera la clas, adultos ensin valor p’aceder a servicios en galés: en resume, internalización de los estereotipos negativos”
El Codigu de los Editores pol que la prensa tien de guiase protexe los drechos de persones individuales de los comentarios ofensivos y l’Acta d’igualdá roblada en 2010 protexe amás a 9 carauterístiques de coleutivos concretos, a los que se propón amiestar l’idioma.
Mrs Saville roberts, cabezalera de Plaid Cymru en Westminster, alertó del xorrecimientu de la intolerancia y comparó les pallabres d’odiu contra la llingua col camín más rápidu faza los delitos y agresiones d’odiu. “La llingua ye más qu’una ferramienta de comunicación, pa munchos, el galés ye la so llingua materna. Ye la llingua del llar, de la comunidá y del llugar de trabayu. ¿por qué tendría esta xente que tar forciada a xustificar la llingua na que piensen, na que trabayen y na que viven? Ye pa nos tan natural y normal comu l’inglés pa aquellos nos que l’inglés foi la primer llingua. Atacar la llingua de Gales y polo tanto a los sos falantes ye, de fechu, un delitu d’odiu, pero la llei nun lo recueye asina. Les quexes son inoraes baxu la premisa de que la llingua nun ye una carauterística protexía”
Asina que soliciten al gobiernu de Westminster que considere camudar esto de mena que nel futuru los falantes de galés nun tengan que lluchar escontra la burlla repitía ya’l ridículu.
Llucía F. Marqués
This work is licensed under a Creative Commons Attribution 4.0 International License.
