La denuncia de la precariedá, la represión y la discriminación  llaboral de xéneru cientraron les movilizaciones del ún de mayu

El manifestamientu convocáu polos sindicatos “minoritarios” (CNT, CGT, CSI y SUATEA) entamó esti añu delantre La Sindical, revindicando asina la importancia d’esti edificiu dientro’l movimientu social y obreru ante les recientes menacies de baltalu.

Dende ellí,  alrodiu de 4.000 participantes salieron direición al Náuticu, xuniendo nes conseñes glayaes nel camín toles revindicaciones n’activu anguañu, dando a entender que la llucha del pueblu asturianu ye una, seique tenga munchos frentes.

Por supuestu,  el fin de la precariedá llaboral ya’l desemplegu y la llamada a la llucha nes cais foron los principales exes de los llemes y pancartes, xunto cola y denuncia de dellos procesos llaborales abiertos, pero a elles esti añu sumáronse munches otres, como la desixencia d’unes pensiones dignes, la Oficialidá, el fin de la represión y la derogación de la llei mordaza, la llibertá de los presos políticos y mui especialmente, la xusticia pa les muyeres ya’l fin de la discriminación llaboral por razones de xéneru.

Llucía F. Marqués

Semeyes Iyán Dos Santos

This work is licensed under a Creative Commons Attribution 4.0 International License.