La ochava edición del Concursu de Canción Asturiana Conceyu de Sieru inclui como obligatorio un mínimu d’una pieza n’asturiano na final
La organización del Concursu de Canción Asturiana de Sieru vien de presentar les sos nueves normes coles que busca elevar el nivel ya’l prestixu del certame.
Les principales novedaes son l’aumentu de dos xornaes eliminatories que se celebrarán en El Berrón ya incluyiránse canciones obligatories -a escoyer entre siete con un nivel de dificultá altu-. Amás, la nueva normativa del concursu determina que na final polo menos una de les pieces tien que ser dafechamente n’asturiano, ensín amiestos nin castellanismos.
Con alrodiu de 50 intérpretes, entregaránse siete premios masculinos y siete femeninos dotaos con 4.200 euros en metálicu, amás de dos premios especiales a la modalidá vaqueira Memorial Graciano Gutiérrez y al canciu dialogáu Memorial Agustín Argüelles-Diamantina Rodríguez.
El concursu entámenlu’l Conceyu de Sieru y l’Asociación de Folclor Amigos de la Tradición (Afatra), en collaboración cola Caxa Rural, los conceyos de Sariegu, Bimenes y Noreña, la Conseyería de Cultura, Amigos del Roble, Biloba, Belarmino, el periódicu El Comercio y la Imprenta Noval. El xuráu tará entamáu por María Luisa Díaz Ordóñez, Genaro García Rodríguez, ‘Tolín’ y Javier Parajón.
Les primeres eliminatories del concursu sedrán el 13 ya’l 20 de mayu y la iscripción al mesmu tará abierta dica’l 27 de abril, pudiendo facese en persona na Fundación Municipal de Cultura, o llamando al teléfonu 636229954.
Nuria Prendes
This work is licensed under a Creative Commons Attribution 4.0 International License.
