La “Plataforma Contra la Cooficialidad del Asturiano” llanza una encuesta sobre la Oficialidá na so páxina de Facebook y pierde por 80% a 20%
Hai tres díes la páxina de Facebook autonomada “Plataforma Contra la Cooficialidá del Asturiano”, conocía por llanzar argumentos inverosímiles en contra la llegalización de la llingua’l país y convocar concentraciones de siete persones, propuso una encuesta cola entruga de “¿Estás en contra o a favor de la cooficialidad?”. A tres díes de finar la encuesta, con 2.100 votos rexistraos, l’ochenta por cientu los participantes na mesma votaron a favor de la Oficialidá.
Depués de los primeros votos a favor, foron abondos los usuarios que denunciaron la imposibilidá de votar a favor ya mesmo’l bloquéu de cuentes pa torgar que se votare llibremente. Sicasí, pese al enfotu puestu pola plataforma pa remanar la votación nel so favor, namás 420 participantes amosaron la so disconformidá cola Oficialidá, frente a los 1680 que, fasta l’intre d’escribise esti artículu, defenden el reconocimientu de los drechos llingüísticos del pueblu asturianu.
Llucía F. Marqués
This work is licensed under a Creative Commons Attribution 4.0 International License.
