“Si nun me maten, nun me creen” .  Esa foi una de les conseñes más repetíes a lo llargo de les tres concentraciones qu’aconceyaron güei a miles d’estudiantes asturianos en refuga de les caberes sentencies por delitos de violencia sesual. Una frase terrible, tantu más cuando ye cierta.

Diez de mayu, fuelga d’estudiantes de secundaria y universitarios, y esta vegada nun ye una reforma educativa lo que ta enriba la mesa, sinon la seguridá de les propies estudiantes.

Tres d’unes sentencies que, según les representantes de los estudiantes “dan via llibre a los violadores pa facer con nos lo que quieran”, les moces nun se sienten segures. Denuncien la proteición que’l sistema ufre a los agresores –“A elles la culpa, a ellos la disculpa”-  y desixen unes lleis que protexan a les muyeres, porque “les cais, la nueche, tamién son nueses”. 

Nes tres concentraciones convocaes esta mañana n’Avilés, Xixón y Uviéu aconceyaron miles d’estudiantes, mozos y moces que tienen bien claros los conceutos: “Cola ropa o ensin la ropa, si nun quiero, nun se toca” “Nel mio cuerpu mando yo” ,“Si nun ye consentío ye violación” o el ya míticu “Non ye non” foron dalgunos de los glayios que se ficieron sentir. “Yo si te creo” foi otru, pero siendo coscientes de que de pocu val que les crean o non, porque, eso tiénenlo claro los nuesos estudiantes:

“Los xueces españoles amparen violadores“.

Llucía F. Marqués

This work is licensed under a Creative Commons Attribution 4.0 International License.