Les obres puestes en marcha pol Conceyu de Llanes na desaguada del ríu Ereba na sablera de Cueves del Mar estrocen un área protexío
La sablera de Cueves del Mar ta catalogada nes Direutrices Subrexonales para la Franxa Costera como seminatural, siendo un hábitat d’interés comuñal, recoyíu amás como Zona d’Especial Caltenimientu (ZEC).
Esa homologación, sicasí, nun la consiguió caltener a salvu de les continues agresiones que carez per parte del Conceyu nel procesu d’urbanización de la redolada la sablera y la creación d’aparcamientos.
Nesti casu fixéronse turries nueves a la vera’l ríu de la zona Oeste, baltando decenes d’árboles y matos, afeutando a la zona estuaria, por aciu d’escavaciones y rellenos, con movimientos de tierra y piedres de la zona que dañen la dinámica fluviomareal d’esti espaciu de biodiversidá.
Estes obres pueden suponer delitu contra la Ordenación del Territoriu y tán espresamente prohibíes nel preséu de xestión de la ZEC polo que resulta ablucante que lo acometa’l Conceyu ensin trámite ambiental dalu y col tácitu consentimientu de les alministraciones competentes, Demarcación de Mariñes del Ministeriu, Conseyería de Fomentu y la Confederación Hidrográfica del Cantábricu.
El Conceyu de Llanes yá tien delles denuncies por rellenos non autorizaos nesta sablera, según por obres realizaes onde solo tien autorizáu obres de caltenimientu de la sablera.
Redaición InfoAsturies
This work is licensed under a Creative Commons Attribution 4.0 International License.
