La suma de décades de reconversiones, preslles y desmantelamientos agrícoles, pesqueros ya industriales promovios pol gobiernu central y permitios polos gobiernos del “Principado” finaron col texíu económicu d’Asturies, dexando a 19.014 persones dependiendo de Caritas, más de la metá d’elles d’orixe asturianu

Cuasi 6.000 families asturianes dependen  xeneración tres d’otra de la caridá de cáritas pa comer, mercar melecines o tener vivienda. Amás de Caritas, la Cruz Roxa atiende a otres munches families nesta situación.

1.779 families incorporáronse por primer vegada a Caritas l’añu pasáu, pero la gran mayoría herieden la situación de pas a fios, ya incluso dende los güelos. Nun basta con tener trabayu pa salir de la miseria: pente les 5.723   Families atendíes alcontramos 555 nes que hai, polo menos, un trabayaor en precario, ya que’l 14 % de los trabayaores viven na llende la probitú.

Per otru llau, el 65% de les persones que piden ayudes en Cáritas son muyeres, munches con menores a cargu. Les families monoparentales son un terciu de les que tienen que recurrir a ayudes.

Esmolez tamién l’altu númberu de persones con problemes salú mental que viven na cai y los enfermos que nun pueden pagase les melecines.

Nesta situación, la noticia de que’l “Principado” recortará’l sofitu a Caritas nun 41% pal prósimu añu, fae que l’asociación de caridá tema nun poder facer frente a les necesidaes de la población.

Nuria Prendes

This work is licensed under a Creative Commons Attribution 4.0 International License.