Esta ponte nun ye d’una película de Indiana Jones, ta en Pravia y ye pa pasar xente que se xuega munchu por cruzala
Beifar ye un pueblu de la parroquia de Pronga, nel conceyu de Pravia, con una población averao de 54 moraores, allugáu al par del ríu Nalón y vecín -ríu a traviés- cola capital de la parroquia, del mesmu nome, onde viven otres 61 persones.
Llóxicamente, la xente de Pronga y la de Beifar caltienen una rellación cercana, dificultada pol mediu de comunicación que tienen pa dir d’una población a la otra: atraviesando una ponte siempre a piques de cayer.
Ocho años lleva esperando la so reparación esta ponte, más propia d’una película d’aventures que d’un pueblu asturianu, cuasi imprauticable dende les riaes del branu de 2010.
Pa dir de manera segura de Pronga a Beifar ye preciso dir per Pravia, un trayeutu enforma más llargu que’l cruciar una ponte. Les implicaciones de la falta d’un pasu seguru van más allá del evidente aisllamientu: Munches de les finques de Beifar tienen el so propietariu en Pronga, y viceversa, lo que complica enforma el so curiau y trabayu; amás Beifar tien apeaderu de tren, entantu que’n Pronga nun pueden utilizar el tresporte ferroviariu ensin anantes aventurase pela colgadiella.
Nuria Prendes
This work is licensed under a Creative Commons Attribution 4.0 International License.
