El cantante aprofitó’l so conciertu n’Uviéu p’animar a los asturianos a apostar pola Oficialidá de la llingua y a reclamar condiciones llaborales dignes na nuesa tierra

Montera Picona en man, l’artista, que conoz Asturies de cerca dende’l so pasu pela mili, que fizo en Xixón, declaró la importancia de caltener vives la llingua y cultura asturianes “El bable ye una llingua. Defender lo que ye d’ún ye lícito, ye digno y ye importante“, afirmó García, tres de reivindicar la diversidá cultural de los estremaos pueblos “Cuanta más diversidá de llingües, más bayura pal planeta. Tenéis que pelear pola llingua, pola gastronomía, pol paisaxe…”

Tamién reclamó la recuperación llaboral, un salariu dignu y un futuru pa esta tierra: “Si nun va a haber más mines n’Asturias” declaró, refiriéndose a les recientes declaraciones de Teresa Ribera sobre’l preslle de les térmiques- “que pongan molinos eólicos, o na mar, pero que creen puestos de trabayu. Que se inventen lo que quieran. El cantante animó a los sos fans a salir de la burbuxa teunolóxica y facese cargu del so futuru

N’anteriores declaraciones feches al periódicu El Comercio  ya insistiere na importancia de lluchar polo de nueso, añadiendo’l puntu ecoloxista “Tenéis de preservalo too porque vivís nun paradisu. Los Picos, les vaques, les fabes… Tenéis que tar arguyosos y defendelo a capa y espada, porque ye de llei. La bomba. Anantes de tocar un centímetru, anantes de facer una obra nueva, una autovía, hai que pensálo muncho porque cada centímetru que y quitéis al vuesu país asturianu ya nun tornará”.

Nuria Prendes

This work is licensed under a Creative Commons Attribution 4.0 International License.