L’Audiencia Provincial confirma la sentencia que condergó al secretariu xeneral de la Corriente Sindical d’Esquierda y cuatro trabayadores de les cafeteríes del Grupu Cuadonga por participar n’una concentración na que se glayó la mítica conseña de toles manifestaciones asturianes dende va décades “la próxima visita será con dinamita”

Acusábase-yos d’un delitu por menacies y fueron condergaos por ello. El motivu, participar nuna concentración -en defensa de les trabayadores de les cafeteríes del Grupu Cuadonga- na que se glayaron conseñes que la xueza consideró “amenaciantes”. En concretu, “la próxima visita va ser con dinamita”.
Dende la CSI ironicen sobro ello “De toos ye sabío que les miles de vegaes en que se repitió esa mesma espresión en movilizaciones llaborales n’Asturies, el pasu siguiente foi una visita con dinamita, coles estroces materiales y los daños personales de toos conocíos…”

La xueza que dictó la condena en primer istancia analizó la frase aisllada del contestu de conflictividá llaboral nel que se produxeron los fechos, amenorgó a una sola les munches conseñes que se glayaron esi díe y aceutó que s’escoyeren a deu ente cuasi un centenar de persones que la coriaron a los 4 trabayadores despidíos y al secretariu xeneral de la CSI. L’Audiencia Provincial confirmó esta conderga, apelando a “la llibertá de la xueza pa valorar les pruebes al so llibre entender”
Como resultáu de too ello, reclámase-yos una sanción de 720 euros, importe que supera en 20 el salariu mensual de estes trabayaores.

Llucía F. Marqués

This work is licensed under a Creative Commons Attribution 4.0 International License.