L’ I.E.S. Dr. Fleming, Aramo y San Ignacio, toos d’Uviéu, repartiéronse los tres primeros premios nuna Olimpiada que nesta edición tuvo tres sedes y una participación de 160 escolinos
La entrega de premios tuvo llugar na mesma Facultá de Química na que’l sábadu 9 de xunu se ficiera la preba a la mayoría de los participantes, los 123 correspondientes a la fastera central. Otros 7 esaminábense al tiempu en Vegadeo y 30 más en Llanes, un total de 160 estudiantes de bachilleratu ya ESO que compitieron p’amosar los sos conocimientos de química.
El ganaor de la preba, Pelayo Mochal Salas, del istitutu Dr. Fleming, algamó una nota de 8’2, siendo la nota media de 4’3, seique esta media vióse seriamente afeutada pola presencia de unes poques notes mui baxes, aprobando la mayoría de los presentaos. El segundu premiu foi pa Nicolás Botas, del IES Aramo ya’l terceru recayó en Juan Antonio Trobajo Flecha, del IES S. Ignacio.Arriendes d’ellos, entregáronse diez menciones d’honor a los vinientes meyores clasificaos.
Pente los iscritos a la preba, el 63% de les participantes ya’l 78% del profesoráu foron muyeres, lo qu’amuesa una emportante feminización de les ciencies. 135 de los escolinos procedíen d’istitutos d’ensiñanza secundaria pública, frente a 25 de la concertada.
Llucía F. Marqués
This work is licensed under a Creative Commons Attribution 4.0 International License.
