La Encuesta de Cadarma Salarial d’Asturies desvela que la fienda ente ricos y probes sigue enanchándose, n’Asturies más que nel restu d’Europa
Los datos, acabantes d’espublizar pol Institutu Nacional d’Estadística (INE), amuesen una Asturies onde los que tienen dineru tienen más ca vegada (un 7% más en 2016) entantu que los que menos tienen ven el so salariu amenorgáu alredor d’un 14%, ampliando descomanadamente la fienda salarial social.
Les desigualdaes que la crisis provocó nel mercáu llaboral asturianu siguen espeyándose nos salarios y mientres que les nómines más altes amuesen los efectos de la recuperación económica, les baxes siguen diendo a peor, de manera que la fienda ente’l 10% de los trabayadores que más cobren y el 10% que cobra menos atopamos con una diferencia de cuasi cuatro mil euros añales.
Dientro d’estes valoraciones nun s’atopen pensionistes nin les persones dependientes de subsidios y ayudes sociales, los sos datos fadríen esta fienda entá más llamativa.
La desemeyanza nun ye la mesma en tolos sectores; asina, los que trabayen nel sector servicios perciben una media de 8.000 euros menos que los que lo faen como emplegaos na industria. Otra de les fiendes más acentuaes ye la que dixebra los trabayadores con contratu temporal de los que cunten con unu indefiníu, con una diferencia de salarios medios de más de 7.000 euros al añu.
Pero si en daqué destaca Asturies ye pol tamañu de la so fienda por xéneru, una y bones les muyeres ganaron como media un 29,4% menos que los homes, una diferencia media de siete mil euros qu’afecta tantu a los salarios altos como a los baxos. Una muyer trabayando en precariu con contratu temporal nel sector servicios tendría añalmente unes retribuciones añales quince mil euros inferiores a les d’un home con una bona nómina.
El relevu xeneracional xuega a la contra de el trabayadores, una y bones los contratos indefiníos de los que se xubilen tán siendo sustituyíos por empleos precarios con nómines bien inferiores o por subcontrates en condiciones bien perbaxo de los contratos anteriores.
Llucía F. Marqués
This work is licensed under a Creative Commons Attribution 4.0 International License.
