Los mineros reclamen pal so seutor les mesmes aides de rescate que s’aplicaron a la banca, el mercáu automovilísticu o a les autopistes

El preslle definitivu de la minería asturiana, planeáu y executáu demientres años ya enormemente facilitáu pol marafundiu y robu perpetraos pol SOMA ya’l PSOE cola complicidá del gobiernu español, abulta inminente.

La escoyeta d’una ministra d’economía favoratible d’una transición enerxética que se pretende facer a más velocidá de lo factible, enemiga declarada de la xeneración elléutrica utilizando recursos fósiles pinta un futuru prietu pal coleutivu’l carbón.

Sicasí, dende la minería consideren que ye posible que’l estáu se ficiere cargu de los gastos de caltener les poques explotaciones abiertes anguañu, permitiendo a les families y a les cuenques siguir alendando. Resalten que caltener en furrulamientu les esplotaciones mineres permitiría dotar una reserva estratéxica de combustible, independiente de los precios que-y impongan los mercaos esteriores, siendo un garante nes crisis enerxétiques.

Proponen tamién poner en marcha’l proyectu yá demostráu de captura del CO2 de la combustión del carbón, pudiendo almacenase o utilizase n’otros campos, sacando un máximu rendimientu a los procesos mineros de demanda enerxética.
Según los trabayadores, facese cargu d’esta garantía enerxética supondría bien menos que’l rescate a la banca, a autopistes quebraes, a ayudes a otros seutores como l’automovilísticu.

Por too ello, los trabayadores de la minería convoquen un conceyu na Casa de la Cultura de La Felguera el xueves 28 de Xunu a les 17.00 hores, nel que cuenten que participen los prexubilaos, pensionistes y tou/a aquel/la que deseye participar, “Xuniéndonos so un mesmu lema que nun ye otru que salvar estes contornes onde queremos siguir trabayando, viviendo y creciendo xuntos”

Llucía F. Marqués

This work is licensed under a Creative Commons Attribution 4.0 International License.