Claudia García Díaz, transesual, cúntanos la so esperiencia cola esperanza de facer entender les dificultaes que tienen de superar los que, como ella, s’enfrenten a la incomprensión y los prexuicios pa consiguir ser quien son. Anguañu tien en marcha una denuncia contra’l SESPA por desatención sanitaria y otra pa anular el so suspensu en práutiques, al ser despidía por quexase pol continuu acosu nel alrodiu llaboral
Pa Claudia too entamó comu pa tol mundiu: a los 9 años empezaba sentir coses a les que nun podía poner nome y nun foi hasta los 16 cuando afayó con toles lletres lo que yera, “pero reprimíme dos años más, siendo quien nun yera por mieu a les consecuencies”. De magar entós asocediéronse los problemes y l’acosu na redolada llaboral, académica y sobremanera, médica y llegal.
Aportó a la Unidá de Xeneru a la gueta d’ayuda a los 18 años, cuasi 19 pero atopóse con qu’ellí nun la trataben bien, como denuncia que-yos asocede a munchos que van, ellí: “carecí tou tipu de vexames, test sesistes, negativa a mandame col endocrín a pesar de precisalo” … La sicóloga tampoco-y foi d’ayuda, acabó espiricando con ella fuertemente y abandonando la unidá, con un intentu de suicidiu al otru díe qu’acabó col so ingresu nel hospital de Xove.
Pa buscar solución allegóse a Salú Mental y a endocrinos d’hospitales públicos y privaos, pero mientres los primeros deriváben-y de vuelta a la Unidá de xéneru, los segundos abellugábense nos sos prexuicios y/o desconocimientu pa nun tratala, fasta qu’un médicu realizó un pequeñu informe describiendo la so situación que-y abrió delles puertes.
Les coses entamaron a ameyorar a principios del añu pasáu, cuando aportó al hospital de Cagüeñes pa empecipiar la fonocirugía de reasignación de sesu. Pídenos equí que mentemos a la foniatra Paz Corte, “una profesional de los pies a la tiesta” y al doctor Faustino Nuñez, el ciruxanu del HUCA que realizó la operación. Anguaño acude a llogopedia en Cagüeñes con Liliana Santamarina, que foi de gran ayuda en tol procesu, tantu personal como profesionalmente, pero les consecuencies de l’anterior denegación d’atención faen que tenga de siguir con tratamientu para los sos problemes sicolóxicos.
Con tola documentación en riegla foi en xineru a solicitar el cambéu de DNI nel rexistru civil de Xixón, onde-y lo refugaron ensin razón aparente. Claudia decidió entós facer públicu’l so casu, denunciando lo asocedío y desixendo una Llei Trans que protexa a toles persones na so situación.
N’abril volvió intentalo, nesti casu nel rexistru d’Avilés, con resultáu entá peor. Claudia denuncia’l tratu despreciatible y poco profesional de la funcionaria encargada de llevar los espedientes, quien llegó a poner torgues nel procedimientu y unviar notes al fiscal para encamentar la denegación del cambéu.
Va dos selmanes aportó la sentencia denegatoria per parte de la jueza, a pesar de cuntar cola aprobación del fiscal pal so cambéu d’identidá, acreditando que la documentación que presentó yera válida. Ye nesti intre, énte l’actitú a la defensiva de la funcionaria y la secretaria xudicial, cuando surde’l barruntu de prevaricación, cuidao que la totalidá de los requisitos llegales cumpliense pero sigue ñegándose’l drechu.
En posteriores xuntes cola secretaria xudicial – conversaciones de les qu’esti mediu tien grabación- insiste dnesti puntu, ensin recibir nenguna desplicación válida y siendo acusáu d’amenaces por non arrenunciar nes sos reclamaciones, énte lo qu’ella-yos informa de que va allegar a los medios de comunicación.
Finalmente opta por denunciar al SESPA, reclamando los gastos del tratamientu y la posterior vaxinoplastia que va realizar por privao, denunciándolos tamién pol dañu moral carecíu.
Anguañu ta estudiando y faciendo un curtiu cinematográficu con fines educativos “de la man d’unu de los meyores guionistes y directores de cine n’Asturies” nel que narra xuna hestoria d’una moza transesual con una vida asemeyada a la suya. “porque quiero dar a conocer a travies de la ficion una realidá bien difusa anguañu, como ye’l ser transesual y camudar de xéneru”
Llucía F. Marqués
This work is licensed under a Creative Commons Attribution 4.0 International License.
