Grace García Guerrero
La desemeyanza ye esta: Nós nun guardamos silenciu si vos ataquen. Nun mos da nengún tipu de gustin nin sensación de poder que vos manquen. Nun sentimos mafia-complicidá ante los abusos que puedan realizavos Nun guardamos dalu tipu de silenciu cómpliz.
Antiayeri tuvi d’esplicar por enésima vegada a dos homes de 30 años la diferencia ente machismu y feminismu. Ellos taben convencíos de que’l feminismu yera lo mesmo que’l machismu pero al aviesu, ello ye, una especie de guerra ente bandos, y a ver quién podía más.
Nun tengo nin puñetera idega de cómo pudo estendese asemeyada burricada ente los homes relativamente nuevos, pero si se que los homes de 45 y p’arriba saben perbién que ye’l feminismu.
El feminismu ye un movimientu que busca la igualdá de xéneru, la igualdá respetando tamién lo que nos fai estremaos. Tenemos fíos varones, nunca deseyaríamos el so sufrimientu. Presiento que l’equívocu estendióse porque los que sí sabéis lo que ye y significa, guardastis silenciu.
A ver comu desplicáis a los vuesos fíos que sois d’izquierdes, pero qu’enxamás vos implicasteis na más emportante de les desigualdaes, que ye la de xéneru, y qu’ante esa, cualquier llucha política ye una menudencia, nin siquier la llucha de clases. Hey, homes, tenéis pendiente una arrenuncia cosciente a los privilexos, y a la complicidá canalla y criminal que caltenéis ente vós y que a nós nos destrúi la vida.
This work is licensed under a Creative Commons Attribution 4.0 International License.
