La hostelería ye anguañu un seutor perimportante n’Asturies no que  cinca a emplegabilidá. Sicasí, dende la CNT Asturies denuncien que les condiciones llaborales tan lloñe de permitir a los trabayaores una vida digna

El sindicatu denuncia l’incumplimientu les condiciones llaborales afitaes nos convenios coleutivos. Sueldos perbaxo lo estipulao, xornaes maratonianes fuera la llei, hores estres non retribuyíes, incumplimientu de les desixencies d’hixene y seguridá, trabayos ensin contratu o con contratos que nun se correspuenden col trabayu real…

Ante la escasa utilidá de les denuncies n’Ispeción de Trabayu y nos xulgaos, el sindicatu CNT Asturies  vien de poner en marcha una campaña pa recoyer información y concienciar de los problemes de los trabayaores de la hostelería. Pa ello, entamen una encuesta, anónima dafechu, na que los cocineros, camareros, recepcionistes, llimpiadores,  repartiores y tolos emplegaos n’hostelería pueden apurrir datos de la so situación, colos que debuxar un cuadru real del abusu nel seutor.

Una vegada finada la encuesta espublizaránse namás les conclusiones xenerales de la mesma, col envís d’usala como puntu de partía pa entamar la movilización nel seutor.

Nuria Prendes