El secretariu d’organización y programa de Podemos quinxo llevar los méritos de la llucha escontra la corrupción n’Asturies, dispreciando’l llabor de décades d’organizaciones asturianes comu Andecha Astur o Ecoloxistes n’Aición y remanando pa si denuncies feches muncho anantes de la mesma esistencia’l so partíu

Nel alcuentru de formación de militantes que tuvo llugar na Universidá Llaboral de Xixón, Pablo Echenique faló con condescendencia de los asturianos, dando a entender que foi necesario qu’un partíu español comu Podemos viniere a salvanos de la corrupción y la indefensión. Les sos pallabres resúmense na fras cola que se facía de güelpe col méritu de toles lluches desendolcaes n’Asturies, incluso col de dalgunes previes a la esistencia del partíu moráu “Ensin Podemos nun veríemos n’Asturies una llucha escontra la corrupción”.

De les declaraciones d’Echenique despréndese non solo dispreciu pol llabor ayenu sinón un fondu desconocimientu de la realidá asturiana, remanando pa sí los méritos de lluches previes a la mesma apaición del so partíu y obviando incluso’l trabayu de miembros de Podemos que trabayaron anantes n’otres organizaciones.

En concreto, Echenique mencionó’l casu’l Musel, denunciáu por Andecha Astur nel 2008, seies años anantes de l’apaición de Podemos nel escenariu asturianu, ya’l fraude de los Fondos Mineros, que la mesma formación nacionaliega lleva décades denunciando, siendo los únicos que continúen pidiendo que s’investiguen responsabilidaes a tolos niveles, incluyendo al entós presidente Vicente Álvarez Areces. De fechu, A.A fizo nel 2002 una campaña denunciando espresamente a Villa y lleva más de 17 años denunciando’l desvíu de los fondos mineros “Dende qu’escomenzaron los propios fondos y vimos qu’en cuentes de “reconversión” hebio enriquecimientu de dirixentes sindicales, que se xestionaba dende Madrid y qu’ensiquiera nun llegó too a Asturies -anque fuera pa robalo la Mafia’l PSOE-SOMA-UGT-“.

Escaecen munches otres lluches hestóriques, como’l recursu a la regasificadora o les denuncies polos rellenos illegales nel Musel, pente munches otres qu’Ecoloxistes n’Aición llevaron alantre o, de nuevu dende Andecha Astur, la paralización del PGOU de Llanes, la denuncia polos acidentes nel pozu Nicolasa o’l tema del Niemeyer.

Nuria Prendes

This work is licensed under a Creative Commons Attribution 4.0 International License.