Depués d’un semestre d’aparente meyora nel serviciu, permitida por un refuerzu na estaya de maquinistes, no que va de mes van suprimiéndose 350 servicios, de los que 330 yeren de cercaníes y 20 de media distancia.

La falta d’adecuación a la lluvia, les averies o mal estáu del material, vehículos ya istalaciones (en dalgún momentu llegó a tar en taller fasta’l 40% del material rodante), la falta de plantiya nos talleres, l’amenorgamientu de trenes ya’l retayu indiscrimináu de los servicios “menos rentables”-especialmente na fastera rural del país- debuxen un panorama de desaniciu descuayante.

La esperada y urxente inversión prometía pol esministru de Fomentu español, Iñigo de la Serna, que ya taba afitada nel Plan de Cercanies p’Asturies, vien de ser indefinidamente pospuesta pol nueu Ministru de Fomentu, José Luis Ávalos, quien remite la solución a un futurible Plan de Cercanies a nivel estatal, nel que les necesidaes de comunicación asturianes pasarán de xuro desapercibíes.

La desconesión de la contorna rural asturiana nun ye un problema prioritariu pa una xestión de les comunicaciones orientada al aprofitamientu económicu y previsiblemente privatizable, menos entá si el problema, comu Ávalos propón, se trata a nivel estatal.

De magar la desapaición de FEVE comu tal ya la so integración en RENFE/ADIF nel añu 2013, Asturies asiste a un nueu pasu nel procesu empobináu a la precarización de la so fastera rural, cola que se ta favoreciendo la so despoblación, al mesmu tiempu que vemos menaciáu’l calter públicu d’un serviciu de vital importancia pa garantizar la conesión del país.

Nuria Prendes

This work is licensed under a Creative Commons Attribution 4.0 International License.