La formación nacionaliega ye de les primeres en sumase a la propuesta, rializada dende Lluchamos pola Soberanía, de movilización conxunta pal Díi de la Nación Asturiana, ante l’anuncia fecha pola Casa Real española d’acudir a Cuadonga nesi díi presentándose como llexítimos herederos del Reinu d’Asturies

Andecha considera qu’esti ye’l momentu más afayaizu pa da-y puxu a la reivindicación hestórica de la República Asturiana, cola monarquía española especialmente desacreditada, pero da-y a la so participación nos actos un envís nidiamente soberanista, especificando con enfotu que la república que defenden ye l’asturiana “Andecha Astur non solo responderá al patéticu intentu de reivindicase en Cuadonga, y faer la presentación oficial de la que cuenten sedrá la so sucesora nel tronu, sinon que priorizará la reivindicación de la República Asturiana como un apueste de futuru que garantice la soberanía y el respetu a los drechos individuales y colleutivos del Pueblu Asturianu.”

Nesi sen, considera que la propuesta rializada dende Lluchamos pola Soberanía, de movilización conxunta pal Díi de la Nación Asturiana, ye asumible dafechu y espera que seya lo más xunitaria y popular posible.

La campaña “República Asturiana” entamará unos díes anantia con charres d’espertos n’hestoria d’Asturies y continuará depués del 8 Setiembre con dellos actos y materiales revindicativos con esi llema.

Redaición InfoAsturies

This work is licensed under a Creative Commons Attribution 4.0 International License.