La empresa, que careció un grave incendiu a entamos d’añu, llevaba más de tres años manexando materiales tósicos ensin cuntar cola necesaria Autorización Ambiental Integrada

Pesi a los precedentes de desastres medioambientales y a la denuncia presentada pola Coordinadora Ecoloxista d’Asturies por nun tener l’autorización ambiental integrada, la planta de xestión de residuos de la empresa Daniel González Riestra SA nun sedrá sancionao y recibirá l’AAE con tres años de retrasu.

El pasáu 4 de xineru una quema incontrolao de materiales tósicos na planta que la empresa tien nes afueres de Xixón prevocó problemes respiratorios a abondos ciudadanos y llevantó la sospecha de que daqué nun yera correcho na xestión del desguace, comprebándose que nun tenía la correspondiente AAI (Autorización Ambiental Integrada) pa desendolcar la so actividá.

La empresa entardó 3 años en conseguir esti trámite, teoricamente obligatoriu pa poder furrular, ensin que’n dalu momentu se paralizare el trabayu nin se tomaren midies por parte’l Conceyu de Xixón. Tou ello nun foi torga pa que venga de concedéseyos, ensin mediar sanción pesi a la denuncia interpuesta va 7 meses pola CEA.

Redaición InfoAsturies

This work is licensed under a Creative Commons Attribution 4.0 International License.