La rempuesta a la convocatoria “Asturies nun tien rei, Soberanía y República” ta teniendo una fuerte acoyida pente la población asturiana, una de les más reconocidamente antimonárquica del estáu

Son ya cerca de venti les organizaciones y coleutivos que van confirmando pol intre la so participación na marcha a pie de les Arriondes a Cangues y la posterior concentración, pudiendo confirmase ya la presencia de los partios políticos Andecha Astur, Izquierda Asturiana, Partido Comunista de Asturias y UJC/Mocedá Comunista, los coleutivos Darréu, Xunta Estudiantil Asturiana, Corriente Sindical d’Izquierda, FAMYR, FUSOA, Asturies Llaica, Les Violetes, el Bloque Críticu, Asturies Rebelde y Bujarra, asina comu los Centros Sociales de La Llegra, La Llume, Cambalache, el Mataderu y Sestaferia.
L’actu d’entrega del “Principado” a la infanta Leonor nel mesmu Díi de la Nación Asturiana, tou un actu de propaganda y llexitimación de la monarquía española, foi el desencadenante d’esta convocatoria de Lluchando pola Soberanía, a la que tan llamaos “toles asturianes y asturianos que comparten los valores del republicanismu y refuga a la monarquía, defendendo un modelu social meyor p’Asturies, nos que la soberanía popular y la xusticia social seyan pegollos d’una Asturies con futuru.”
La marcha ta pensada pa que puedan facela persones de toles edaes, compartiendo un espaciu de reivindicación plural. Ente la negación de Delegación de Gobiernu a que la marcha discurra pel marxe drechu de la carretera, como solicitó la organización, la ruta dirá en pela sienda peatonal. Pa facilitar la llegada a Les Arriondes tan contrataos al menos dos autobuses, nos qu’hai que reservar plaza, con una ruta pel interior y otra pela costa.

Redaición InfoAsturies

This work is licensed under a Creative Commons Attribution 4.0 International License.