Mientres la monarquía española perpetraba otru intentu de xustificar la so esistencia usurpando una hestoria ya una simboloxía que nun ye’l de so, un ríu azul repúblicanu marchaba al par del Seya con un mensaxe mui claru: Nun vos queremos equí

Ésitu d’asistencia na rempuesta asturiana a la ofiensa de la presencia de los reis d’España en Cuadonga, entamada pol colleutivu “Lluchando pola Soberanía”. La marcha republicana, baxo’l llema “Asturies nun tien Rei”, xunió con ésitu estremaes organizaciones que fain suya la reclamación d’una República frente a la monarquía española.

La marcha, de siete km., desendolcóse con normalidá, pente eslóganes contra los borbones, reclamaciones de soberanía pal Pueblu Asturianu y pitaes de sofitu de los coches que la cruciaben, fasta la entrada, entre aplausos, en Cangues. Un únicu español punxo’l puntu cómicu-violentu tratando (con afortunada mala puntería) de llanzar güevos a los manifestantes, dende la so ventana orniada cola bandera franquista.

En Cangues tuvo llugar la intervención política, onde se reclamó nuevamente la soberanía pa los asturianos y se refugó la dominación monárquica, remembrando les consecuencies catastrófiques que tuvo  p’Asturies.

“Tamos equí pa dicir que non, que nun tenemos amos, que güei los asturianos y les asturianes somos un pueblu dignu en movimientu, un pueblu mirando al futuru, que tamos dimpuestos a axuntar toles fuecies, que vamos costruyir alternatives p’avanzar haza una Asturies y un mundiu nos que se pueda y pague la pena vivir”.

Entantu, les sucursales n’Asturies de Podemos ya IU n’Asturies obviaron l’agresión monárquica y miraron pa otru lláu cellebrando sendes folixes.

Nuria Prendes

This work is licensed under a Creative Commons Attribution 4.0 International License.