El comité d’empresa del Centru de Díe Específicu d’Alzheimer de Turón denuncia’l retayu d’una ambulancia, alertando de que con namás 3 ye prauticamente imposible cumplir los horarios llegales, amás del trestornu que supón ampliar los viaxes, tanto pal cientru como pa los usuarios, persones mayores con estremaos graos de dependencia y llocura
Nel últimu pliegu de llicitaciones, l’alministración prescindió d’un vehículu, de los cuatro que tenía. Nesti tipu de centros, recordamos, dependientes de l’alministración y subcontrataos a empreses privaes, les ambulancies treslladen dende les so cases al centru de díe a los usuarios del mesmu.
Llegalmente les persones usuaries nun pueden permanecer más de 45 minutos nel tresporte, nun ta permitía la entrada al cientru más tarde de les 10:30 hores nin anantes de les 9:30 hores de la mañana, y la salida del centru nun puede ser mas tarde de les 17:30hores nin anantes de les 16:30 de la tarde.
El centru ta allugáu a 9 Km de Mieres, lo qu’implica un treslláu d’al menos 15 menutos, una y bones la mayoría de les persones usuaries son de la villa, pero esti trayeutu ye mayor cuando se recueyen usuarios que viven nos estremos del conceyu, dende’l Padrún (llinde de conceyu con Uviéu), Bustiello (partiendo con el conceyu de Moreda), San Andrés, Cuestavil etc.
Con estes carauterístiques y 3 tresportes, cumplir les normes ye tou un retu, mesmo si un de los vehículos sal anantes del cientru pa duplicar los viaxes.
Esti nun ye un problema esclusivu del cientru de Turón, l’alministración tamién retayó el serviciu de tresporte n’otros centros dependientes de la conseyería, lo qu’ocasiona qu’en centros de díe de poblaciones de circuscripciones alloñaes del centru d’Asturies, tales como Cangas, L.luarca o Nava, los tresllaos seyan cada vegada más llargos.
Poro, el comité quier faer fincapié en qu’esta situación tien que camudar, “esperemos que la conseyería recapacite y tenga bien modificar de dalguna forma esta situación”. Los trabayaores de los Cientros de Díe tamien tan agora mesmo en llucha pola meyora de les sos condiciones llaborales.
Redaición InfoAsturies
This work is licensed under a Creative Commons Attribution 4.0 International License.
