Cada añu entama’l cursu con dalgún rapacín que nun tien garantizáu’l so drechu a la educación por falta de tresporte. Esti añu tocó n’Allande, con tres escolinos de cincu y ochu años que nun tienen como dir al colexu

El casu d’estes families nun ye nuevu: nun hai autobús que se faiga cargu de dir a recoyer la reciella. Pa enriba, los tasis nun quieren subir a Aguanes, la llocalidá onde moren, pol mal estáu de les carreteres tres de los incendios del añu pasáu. A dos d’ellos la familia ta llevándolos en coche a diariu, la tercera nun tien como baxar a la escuela: la ma ta dimpuesta incluso a dir andando tolos díis cola neña, de 8 años, los cuatro km dica la parada más averada al pueblu, con tolo qu’implica caleyar esi trayeutu tolos díis al riscar n’iviernu, pero nin siquiera asina, la CTA deniégayos plaza nesi tresporte Remembremos que la escolarización n’Asturies ye obligatoria y les families nun tienen la opción, válida n’otros países, d’educar en casa.

Esti ye un casu de duple desdexamientu -el de la falta tresporte ya’l de l’estáu llaceriosu de la carretera, que careció dos argayos esti mesmu sábadu- qu’espeya la política oficial respeuto a les fasteres rurales, la de dexales morrer adulces fasta que la población baxe a les ciodaes por desesperación. Quedase a vivir nos pueblos asturianos requier un actu de valentia cuasi heróica, ensin servicios sanitarios, ensin garanties d’escolarización nin unes vies de comunicación decentes, con perpoques oportunidaes económiques y llaborales… son munches les families que deciden abandonar una forma de vida que, pola so importancia como ayalguera de los raigaños d’Asturies y como curiaora de la natura, debiera tar especialmente protexía.

Nuria Prendes