La bayura del padremuñu artísticu asturianu debiera tar protexía con un cuerpu de restauradores que s’encargare de continuo de torgar el deterioru ya iguar los posibles desperfechos

Casos comu la talla repintada de Rañadoiro o el borráu de les talles del horru de El Condao salten dacuandu a la prensa como barbaridaes pente risibles y alarmantes, enxamás lo bastante castigaes, pero’l problema del desaniciu del  nuesu padremoñu va muncho más pallá. L’abandonu al que ta sometíu el padrimoniu cultural asturianu faese evidente a cualisquiera que visite dalgunos de los nuesos monumentos, o cenciellamente, pa quien pasee per Asturies, pente horros cayendo, castros desaniciaos y castiellos testigos de la nuesa monarquía, esbarrumbaos. Prevenir el desaniciu de los bienes culturales d’Asturies requier de la participación d’espertos na materia que puedan frenar esta decadencia prevocada por sieglos de desdexamientu ya iguar na midía lo posible los daños.

Los profesionales asturianos del padremoñu insisten na necesidá de la creación de puestos  de restauración y conservación na mesma cadarma alministrativa de forma permanente, de manera que puedan abordase planes estratéxicos de conservación preventiva, recalcando la importancia de la prevención ya’l control del alrodiu pa anticipar cualisquier deterioru por obra del tiempu o por man humana.  Porque de pocu val invertir mediu millón d’euros n’iguar una obra que se va dexar pente goteres o al algame d’animales.

Nesti intre nun hai dalu restaurador na plantiya de l’alministración asturiana. Como muncho, dempués de muncho solicitalo, consiguen que se yos convoque dacuandu a les comisiones de Padremoñu, daqué perestremao a la consolidación d’un conseyu de restauraores que permitieren desendolcar un plan de conservación preventiva – con espertos en restauración de pintura, piedra, maera, escultura, texios…- que trabayaren adelantándose a la necesidá d’una restauración.

Como amuesa de la de les  política siguía poles alministraciones responsables del padremoñu, el serviciu de Padremoñu Cultural anunciaba ayeri  una convocatoria para cubrir el puestu de Xefe d’estaya de Conservación y Restauración na Direición Xeneral de Padremoñu Cultural de la conseyería de Cultura, pero en llugar de solicitar un espertu en conservación y restauración, la titulación desixida pal puestu ye… arquiteutura…

Llucía F. Marqués

This work is licensed under a Creative Commons Attribution 4.0 International License.