Pa los sindicatos, l’intentu d’alcuerdu promovíu pola Alministración educativa pa regular la xornada llaboral del profesoráu asturianu foi un fracasu, “prevocáu pola posición ríxida de la Conseyería, qen se niega sistemáticamente a empecipiar un procesu de negociación qu’aborde’l conxuntu de les reivindicaciones sindicales p’ameyorar les condiciones llaborales del profesoráu.”
De partida, dende SUATEA consideraben que la propuesta de partida yá yera insatisfactoria, curiao que recueye solo una parte de les reivindicaciones reclamaes pol profesoráu. Sicasí, considerábase un puntu de partida pa entamar l’alderique, plantegando como positivu l’afitamientu d’una Comisión de siguimientu del alcuerdu que sirviera de base pa futures meyores.
El mínimu que s’esperaba consiguir nestes negociaciones yera la reversión de los retayos en Secundaria, aplicaos tres el RD14/2012, y que supunxo un deterioru incaltenible de la educación pública. Esti alcuerdu suponía garantizar pal cursu que vien la vuelta a la xornada lleutiva previa a la crisis
SUATEA reclamaba que s’ampliare la negociación a Educación Primaria, onde l’incumplimientu del alcuerdu de Plantiyes aumentó na práctica’l pesu de l’atención docente direuta, “polo que ye imprescindible amenorgar la xornada lleutiva pal cuerpu de Mayestros asina comu otros munchos aspeutos qu’incidan nunes meyores condiciones llaborales”.
Sicasí, la falta d’alcuerdu torgó que s’aprobara inclusive esti pactu de mínimos, polo que’l sindicatu d’enseñantes considera que l’Alministración tien la obligación de reconsiderar la so propuesta y abrir un procesu de negociación real, que parta del mínimu ufiertáu nesta infructuosa ronda y qu’abarque l’amenorgamientu de les hores lleutives en tolos cuerpos y amás ameyore otros aspeutos de les condiciones llaborales del profesoráu.
“Esperamos qu’esti intentu fallíu de l’Alministración nun seya utilizáu como xida pa siguir calteniendo la situación actual” declararon dende’l sindicatu. “La Conseyería nun cuntó con naide pa imponer el retayu y nun precisa más que la voluntá política pa revertilu”.
Redaición InfoAsturies
This work is licensed under a Creative Commons Attribution 4.0 International License.
