Salir d’Asturies ye caro, y volver tamién. Nun país con un altísimu porcentaxe de la so población emigrada forzosa, los viaxes son un lluxu por tierra, mar y aire

Per carretera espéranos l’etenru peaxe del Huerna y pel aire, les subides de preciu ocasionaes pola ausencia de compañies aerees encarecen los viaxes dende y fasta Asturies, sumiéndonos nun aisllamientu dificilmente compaxinable cola obligación de miles d’asturianos de salir a trabayar/estudiar fuera y cola cientralización de la economía a nivel estatal, que fae imprescindible los viaxes a Madrid de munchos empresarios asturianos

L’executivu destina de magar 2014 cerca de tres millones anuales d’euros n’incentivos en conesiones aerees direición Asturies, como “fomentu del turismu como fonte d’ingresos pa la economía asturiana”. Los resultaos d’esta inversión son pocu visibles: los 65 menutos que dura’l trayeutu Asturies-Madrid suben de preciu cuasi mensualmente.

Cola fuga de compañies ya en concretu, col abandonu d’Easyjet, el preciu mediu d’ida y vuelta a Madrid cola única aerolinia que cubre’l trayeutu (Iberia) ronda los 520 euros. Ello ye que volar a Asturies dende Madrid (o al revés) cuesta fasta un 26% más que, por exemplu, a Catalunya ya un 22% más que a Santander y Bilbao.  Volar a Europa ye enforma más asequible, cuesta el doble aportar a la capital d’España que a la d’Inglaterra o Italia, pero equí topamos cola dificultá del númberu de vuelos, ya qu’Asturies tien el ratiu de vuelos internacionales más baxu del estáu.

La desapaición del Ferry que salía del puertu del Musel direición a Francia foi otra via presllada pa la movilidá asturiana, ya’l nomáu corredor ferroviariu del Atlánticu, que direutamente nun pasa de Bilbao pel Cantábricu, completa’l panorama d’incomunicación asturianu.

Nuria Prendes