Esti mes cellebróse’n Xixón el IV Congresu Nacional de Repunantes, cola asistencia d’una docena d’espertos na materia, escoyíos pente los más repunantes del país. Darréu apurrimos el discursu íntegru del Presidente Soberanu, David M. Rivas, col que dio aniciu al congresu y que foi recibíu polos asistentes con escasos aplausos y biecos de repunancia
Amigos, amigues; collacios, collacies; compañeros, compañeres; señores, señores; camaraes, camaraes; en fín, esti ye’l problema de los femeninos na llingua asturiana. Pero vamos dir al busilis.
Tamos nesti momentu nel Cuartu Congresu de los Repunantes d’Asturies y tamos nun intre vital, diría que tráxicu. Tamos nel carel de la estinción. ¿Estínguense los llobos?, non. ¿Estínguense los gallos monteses?, non. ¿Los raposos?, menos. ¿Los osos?, non. Tamos n’estinción los repunantes. Tan ganando la batalla los maltomaos.
Hailos maltomaos en tolos sitios, como tamién repunantes en tolos sitios, pero los repunantes tamos en regresión. Na esquierda: repunante, Gerardo Iglesias; maltomáu, Llamazares. Na drecha: repunante, Moriyón; maltomada, Cherines. Y nos mediopensionistes, esos que nun son nin de dreches nin d’esquierdes: repunante, pués nun sé quién dicir, pero pa maltomáu, Albert Rivera.
Tamos en pelligru. N’Asturies deberíen protexemos.
Equí tamos nesta mesa una montonera repunantes. Hailos bolcheviques como Richi. Hailos ¡más que bolcheviques! como Calamidá. Hailos lliberales, pero nun voi dicir quién. Hailos inclasificables como Xuan Nel. Hailes guapes porque somos mayoría de paisanos, más feos y más vieyos.
Ye mester defender la repunancia. Un repunante ye un individu que diz: escontra l’alversidá, poner cara gochu. Pero, al empar, escontra lo que ye bono y mos vien a beneficiar, poner bona cara.
De siempres que los asturianos fuéramos repunantes. Yá engurriamos el focicu con aquello de los romanos, el drechu y comer poco de carne. Y repunante, ¿quién yera?, pues Pelayu. Pelayu yera un repunante. Llegaran los árabes con aquella cosa de la cultura y de llavase tolos díes. ¿Llavase tolos díes?, ¡por favor! Y nun bebíen alcohol, ¿pero cómo pué ser eso? Y Pelayu, que yera un repunante, decidiera sublevase. Y repunante yera, riba tóo, Adosinda, la gran raina, repunante pero de verdá, repunante n’estáu puro, y que nun aparó ata ver nel tronu al so sobrín Adefonso, otru repunante fíu d’un repunante como Fruela y d’una vascona, Munia. Ser vascu nun ye ser repunante esautamente pero ye apaecío.
Otru repunante yera Gonzalo Peláez ya otru de la mesma triba yera Flórez Estrada, tan repunantes los dos que se proclamen soberanos. Don Álvaro declara la guerra a Napoleón, un maltomáu, y llogra l’aida del rei d’Inglaterra, d’una perconocía dinastía de repunantes. Siguin siéndolo. Y Riego, el xeneral? Otru repunante. Acabara colgáu nuna forca en Madrid. ¿Por orde de quién?: por un maltomáu como Fernando VII de Borbón.
Pasa’l tiempu y apaez otru repunante: Belarmino Tomás. ¡Otru repunante! ¿Cómo se pué dir a pidir aída a la Sociedá de Naciones porque Asturies carez l’ataque del fascismu y l’abandonu d’una república gobernada por un maltomáu? Porque Azaña igual yera repunante, sí, podríamos nacionalizalu, pero Largo Caballero yera un maltomáu.
Tamos en pelligru los repunantes. Lo que yo quiero dicir nesti Cuartu Conceyu Nacional de Repunantes d’Asturies, como Presidente Soberanu, ye que nun vamos dir a la independencia. Vamos dir a la interdependencia. Ya ye mui fácile: que los repunantes del mundiu mos unamos.
¡Arriba, repunantes de la tierra, de pies repunante llexón!
Y váis permitime, porque soi repunante dende siempres pero con gran memoria familiar, glayar con vosotros: ¡a les barricaes, pol trunfu de la repunante confederación!
David M. Rivas
P.D. – Nun se fae torna al español pola dificultá intrínseca de tornar el mui asturianu conceutu de repunancia.
This work is licensed under a Creative Commons Attribution 4.0 International License.
