Natalio Grueso, ex direutor de la Fundación Niemeyer, afronta una petición d’once años de prisión y pente los cinco imputaos sumen 25; entantu Vicente Álvarez Areces, presidente honorariu de la Fundación del Niemeyer – que tinía l’aspiración de siguir siéndolo de manera indefinida- y presidente d’Asturies durante’l periodu nel que se produxeron les irregularidaes, permanez indesplicablemente al marxen de les acusaciones
L’Audiencia Provincial de Uviéu alcuerda la suspensión durante un mes del xuiciu a Natalio Grueso, ex-direutor xeneral de la Fundación Niemeyer, acusáu d’irregularidaes relacionaes con factures falses.
Les renuncies de los sucesivos lletraos a defender a Grueso tan ocasionando retrasos nel xuiciu. Nesti casu, l’abogáu n’activu, Fernando Burgos, vien d’asumir la causa va namás tres díes y “nun cuntó con tiempu abondu pa estudiala”. El procedimientu cuenta con 20.000 folios d’información sobre los presuntos delitos continuaos de marafundiu en concursu medial con falsedá, otru societariu y un terceru d’insolvencia punible.
Nun se conoz entá la fecha del nuevu xuiciu, nel qu’amás de Grueso sentarán nel banquín a otros 4 acusaos d’estremaos delitos societarios y d’alministración, pero nun sedrá anantes d’un mes. Si entardare más d’esi mes, ya nun sedría un aplazamientu, sinon que tendría d’entamase’l procesu dende l’aniciu.
José Luis Rebollo, ex secretariu de la Fundación y tamién acusáu, pidió la comparecencia nel xuiciu del expresidente del “Principado”, Vicente Álvarez Areces, quien paez ser que taba al corriente de los problemes de la Fundación. Fasta l’intre nun hai dalu indiciu de que vaiga a ser llamáu.
Llucía F. Marqués
This work is licensed under a Creative Commons Attribution 4.0 International License.
